Ammatit

Suutari

Lehmäntalja viethin parkittavaksi ja siitä tehtiin nahkaa, josta Naimin Matti teki kenkiä. Se oli omaoppinen, mutta se teki kommeita saaphaita. Nokka niissä oli semmonen pikkunen, mutta ei kovin käyrä ja tupsuja oli kans ja pohja oli solapohja.

Matti veteli lankoja suussa, kun se teki pikilankaa. Sillä oli semmosia myösteriä, että tuon kokoset ko tehet, niin kyllä ne suurinpiirthein sopivat ja lestiä sillä oli kans. Se myösteri oli semmonen pahvista tehty malli.

Seppä

No se oli tuossa Kurtakossa se seppä, Kaaskon Jussa. Se teki työkaluja. Se kallitti vikatheita ja vähäs mitäki. Ja tässäki on ollu paja, ennen tuossa ojan varressa. En muista kuka siinä piti, mutta siinä oli sauna ja paja.

Mieki kävin siellä Kurtakossa kallittemassa vikatheita, mutta en mie sinne pajhan sisäle menny. Mie ootin pirtissä ja Sirkka laitto siinä ruokaa ja haki valkean liinaki siihen ja mulleki ruokaa katto, ko se piti kauhean sukulaisena. Jussa tuli sitten sieltä pajasta, semmonen mutarenki, ko se oli. Otti huulesta mällin ja laitto sen siihen valkean liinan pääle. Sirkka nosti semmosen elämän, että.

Tosihaan se viikate piti kallita ohuemmaksi, ko sitä koko kesä liipathin, niin se meni niin paksuksi. Sitten sillä oli taas hyvä niittää karkeita.

Ompelija

Eipä niitä vaatheita juuri saanu ostaa. Niitä teki kuka vain. Joka talossa oli ompelukone. Mieki olen tehny paljon. Kangas oli semmosta ohutta, ei siinä mithän merkintää ollu, että mitä se oli. Aina vain kangasta ostethin. Ja taas jos oli joku vanha vaate, niin se purethin ja tehtiin uusia vaatheita.

Alli Kurtakko (s.1928)